User:Svenn Egil Knutsen
Buoris muv namma l Svenn-Egil, jali Duolljá Sikká Johánná Lise bárnne. Gå iejvviv ietjam fuolgev Svieriga bielen, vierttiv buorástahttet riektaláhkáj váj árvvedi gen máttos lav. Mån lav guovtegielak. Válla ienemusát mån dárustav. Mån lav riegádum ja bajássjaddam Måsken, jali Davve-Måsken. Unna ráhtedis sajásj Helmåvvån. Guokti gålmmi bæjvváj máhtá jåhtelisvanntsajn mannat vuonav sisi Måsskoj.
Mijá vehka; æddnám ja muv gålmmå oappá, Lill-Tove, Solvår, Sølvi ... ja vielljam, Tronna, jådijma Måskes Ájláddáj gietjavlågenannieljen('74). Ájluovdan, dan sæmmi tjavtja álggiv skåvllåj vuostasj klássaj. Unna oappásj, Vibeke, riegádij niellja jage manngela. Dalloj ij lim luohpe sámástit skåvlån. Æjgáda hiejttin sámástit. Ij lim nav buorre sábmen liehket. Valla mån lav ihkevin ávon gå áhkko, siesá ja æddnám ehtjin balá munji sámástit juska lijma láttij siegen.
Mánnávuodan Måsken, divna ulmutja sámástin - máná, nuora ja vuorasappo. Uddni l dal ietjá ájgge – giella l gullunagá gáhtomin - nuora li hæjttám sámástit, jali æjgáda li hæjttám sámástit mánájdisá. Valla uddni skåvlåjn oattjo oahppat ietjat gielav, ja oattjo hájn vil sámástit åhpadiddjáj.